नेपाल टी-ट्वान्टीः जनकपुरको विजयी सुरुवात

काठमाडौँ- नेपाल टी-ट्वान्टी क्रिकेट लिग अन्तर्गत जनकपुर रोयाल्सले विजयी सुरुवात गरेको छ । त्रिवि क्रिकेट मैदानमा आइतबार भएको खेलमा पोखरा एभेन्जर्सलाई ५ विकेटले पराजित गर्दै जनकपुरले विजयी सुरुवात गरेको हो ।

जितका लागि पोखराले दिएको १ सय ३९ रनको लक्ष्य जनकपुरले १७ ओभर ४ बलमा ५ विकेट गुमाउँदै पुरा गर्‍यो । जकपुरलाई जित दिलाउन सन्दिप जोराले सर्वाधिक ४० रन तथा सागर पुनले ३८ रनको योगदान गरे । पोखराका जाहिर खानले ३ विकेट हात पारे ।

---

यसअघि टस हारेर पहिले ब्याटिङ गरेको पोखराले १९ ओभर २ बलमा सबै विकेट गुमाउँदै १ सय ३८ रनमात्र जोड्यो । पोखराका लागि आशिफ शेखले ५० रन बनाए । सिद्धान्त लोहनीले २९ रन बनाए । लोहनीले १६ बल खेल्दा ४ छक्का हिर्काए ।

जनकपुरका लागि केसरिक विलियम्सले सर्वाधिक ३ विकेट लिए । पवन सर्राफ, सराफुदिन असरफ र ललित राजवंशीले समान २-२ विकेट लिए ।

लिग अन्तर्गत पोखराको यो लगातार दोस्रो पराजय हो । यसअघि पहिलो खेलमा पोखराले काठमाडौँ नाइट्ससँग २६ रनको पराजय भोगेको थियो ।