नेपाल टी-ट्वान्टीः जनकपुर प्लेअफ नजिक

काठमाडौँ-  जनकपुर रोयाल्स नेपाल टी-ट्वान्टी क्रिकेट लिगको प्लेअफ नजिक पुगेको छ । त्रिवि क्रिकेट मैदानमा सोमबार भएको खेलमा फार वेस्ट युनाइटेडलाई ८२ रनले पराजित गर्दै जनकपुर प्लेअफ नजिक पुगेको हो ।

सात खेल खेलेको जनकपुरले पाँच जित हात पारेको छ । यता ६ खेलमा फार वेस्टको यो पाँचौ हार हो ।

---

सोमबारको खेलमा जनकपुरले दिएको १ सय ६२ रनको लक्ष्य पछ्याउने क्रममा फार वेस्टले १५ ओभर १ बलमा सबै विकेट गुमाउँदै ७९ रन मात्र जोड्न सक्यो । फार वेस्टका लागि कप्तान हसमातुल्लाह शाहिदीले ३२ रन जोडे । जनकपुरका समिउल्लाह शिनवारीले ३ तथा पवन सर्राफ र सोमपाल कामीले २-२ विकेट लिए ।

यसअघि टस हारेर पहिले ब्याटिङ गरेको जनकपुरले निर्धारित २० ओभरमा ७ विकेट गुमाउँदै १ सय ६१ रन बनायो । जनकपुरका लागि सन्दीप जोराले ३२ बलमा सर्वाधिक ५५ रन बनाउँदा एक चौका र ५ छक्का हिर्काए ।

कप्तान ट्रेभोन ग्रिफिथले ३२ तथा चाडविक वाल्टनले २४ रनको योगदान गरे । फार वेस्टका प्रकाश जैसीले ३ तथा भुवन कार्कीले २ विकेट हात पारे ।