नेपाल टी-ट्वान्टीः जनकपुरद्वारा लुम्बिनी पराजित

काठमाडौँ- नेपाल टी-ट्वान्टी क्रिकेट लिगअन्तर्गत जनकपुर रोयाल्सले लुम्बिनी अल स्टार्समाथि जित हात पारेको छ । लिग चरणको आफ्नो अन्तिम खेलमा जनकपुरले लुम्बिनीलाई २३ रनले पराजित गरेको हो ।

जितसँगै जनकपुरले १० खेलबाट १४ अंक जोड्दै तालिकाको दोस्रो स्थानमा यथावत रहेको छ । जनकपुरले ७ खेलमा जित हात पारेको हो । यता लिगमा दोस्रो पराजय भोगेको लुम्बिनीले १० खेलबाट १६ अंक जोडेको छ ।

---

लिगको पहिलो  प्लेअफमा पुनः जनकपुर र लुम्बिनी भिड्ने भएका छन् । सो खेल आइतबार हुनेछ ।

शुक्रबार जनकपुरले दिएको १ सय ६० रनको लक्ष्य पछ्याउने क्रममा लुम्बिनीले तय गरिएको निर्धारित १७ ओभरमा ७ विकेट गुमाएर १ सय ३६ रन मात्र जोड्यो ।

लुम्बिनीका लागि अनिल साहले ३५ तथा लाहिरु मिलान्थाले ३२ रन बनाए । जनकपुरका लागि ट्रेभोन ग्रिफिथले ३ तथा सामिउल्लाह शिनवारीले २ विकेट हात परे ।

यसअघि टस हारेर पहिले ब्याटिङ गरेको जनकपुरले निर्धारित १७ ओभरमा ६ विकेट गुमाएर १ सय ५९ रन बनायो । जनकपुरका लागि ट्रेभोनले ११ बलमै ४७ रन हिर्काए । उनले ३ चौका र ५ छक्का प्रहार गरे ।

शराफुदिन असरफले ३४ तथा खडक बोहराले २२ रन बनाए । लुम्बिनीका ह्यारी टेक्टर र कुशल भुर्तेलले २-२ विकेट लिए ।