नेपाल टी-ट्वान्टीः जनकपुरलाई पराजित गर्दै लुम्बिनी फाइनलमा

काठमाडौँ- जनकपुर रोयाल्सलाई पराजित गर्दै लुम्बिनी अल स्टार्स नेपाल टी-ट्वान्टी क्रिकेट लिगको फाइनलमा प्रवेश गरेको छ । त्रिवि क्रिकेट मैदानमा आइतबार भएको पहिलो क्वालिफायर खेलमा जनकपुरलाई ६ रनले पराजित गर्दै लुम्बिनी फाइनलमा प्रवेश गरेको हो ।

१ सय ४४ रनको लक्ष्य पछ्याएको जनकपुरले निर्धारित २० ओभरमा ७ विकेट गुमाउँदै केवल १ सय ३७ रन मात्र जोड्यो । जनकपुरका लागि समिउल्लाह शिनवारीले ४५ रन बनाए । पवन सर्राफले ३० रन जोडे । लुम्बिनीका दिपेन्द्र सिंह ऐरी, सागर ढकाल र विपुल शर्माले समान २-२ विकेट लिए ।

---

यसअघि टस हारेर पहिले ब्याटिङ गरेको लुम्बिनीले निर्धारित २० ओभरमा ८ विकेट गुमाएर १ सय ४३ रन जोड्यो । लुम्बिनीका लागि इशान पाण्डेले सर्वाधिक ३८ रन जोड्दा अनिल साहले २४ तथा विपुल शर्माले २० रनको योगदान गरे ।

जनकपुरका लागि असान प्रियन्जन, सोमपाल कामी र जितेन्द्र मुखियाले समान २-२ विकेट लिए । पवन सर्राफ र ट्रेभोन ग्रिफिथले १-१ विकेट हात पारे ।

जनकपुरले फाइनल प्रवेशका लागि अब विराटनगर सुपर किंग्स र काठमाडौँ नाइट्सबीच हुने एलिमिनेटरको विजेताविरुद्ध खेल्नेछ ।