न्यूजिल्यान्डसँग पराजित हुँदा जमानको शतक गयो खेर

काठमाडौँ- न्यूजिल्यान्डले घरेलु टोली पाकिस्तानविरुद्धको तीन खेलको एकदिवसीय सिरिज जितेको छ । शुक्रबार राति भएको तेस्रो तथा अन्तिम खेल २ विकेटले जित्दै पाहुना टोलीले सिरिज २-१ ले आफ्नो पक्षमा पारेको हो । यसअघि पहिलो खेल पाकिस्तानले ६ विकेट तथा दोस्रो खेल ७९ रनले जितेको थियो ।

शुक्रबार राति कराँचीमा भएको अन्तिम खेलमा २ सय ८१ रनको लक्ष्य न्यूजिल्यान्डले ४८ ओभर १ बलमा ८ विकेट गुमाउँदै पुरा गर्‍यो । न्यूजिल्यान्डका लागि ग्लेन फिलिप्सले सर्वाधिक ६३ रन बनाउँदा कप्तान केन विलियम्सनले ५३ र डेभोन कोनवेले ५२ रनको योगदान गरे ।

---

पाकिस्तानका लागि मोहमद वासिम र अघा सलमानले समान २-२ विकेट लिए ।

यसअघि टस जितेर पहिले ब्याटिङ गरेको पाकिस्तानले निर्धारित ५० ओभरमा ९ विकेट गुमाउँदै २ सय ८० रन जोड्यो । पाकिस्तानका लागि फकर जमानले १ सय १ रन जोडेपनि त्यो जितका लागि पर्याप्त भएन । मोहमद रिजवानले ७७ रन बनाए ।

न्यूजिल्यान्डका लागि टिम साउथीले ३ तथा लोकी फर्गुसनले २ विकेट हात पारे ।