पीएम कप महिला क्रिकेटः एपीएफको विजयी सुरुवात

काठमाडौँ-  पीएम कप महिला टी-ट्वान्टी राष्ट्रिय क्रिकेट प्रतियोगितामा नेपाल एपीएफ क्लबले विजयी सुरुवात गरेको छ । सुनसरीको इटहरीस्थित जनता क्रिकेट पार्कमा भएको खेलमा एपीएफले गण्डकी प्रदेशलाई ७ विकेटले पराजित गरेको हो ।

जितका लागि चाहिएको ५२ रनको लक्ष्य एपीएफले ८ ओभर ४ बलमा ३ विकेट गुमाएर पुरा गर्‍यो । एपीएफको जितमा सीता राना मगरले १९ रन, रोमा थापाले १४ तथा ज्योती पाण्डेले ८ रन जोडे । गण्डकीका लागि श्रृष्टी जैसीले ३ विकेट हात पारिन् ।   

---

यसअघि टस हारेर पहिले ब्याटिङ गरेको गण्डकी प्रदेशले निर्धारित २० ओभरमा ७ विकेट गुमाउँदै ५१ रन जोड्यो । गण्डकी प्रदेशका लागि कप्तान श्रृष्टी जैसीले १४ रन जोड्दा अन्य ब्याटरले दोहोरो अंकमा रन बनाउन सकेनन् ।

एपीएफका लागि सुमन विष्टले ३ तथा नेरी थापा, सुष्मा श्रेष्ठ, सीता राना मगर र राजमती ऐरीले एक-एक विकेट हात पारे ।