महिला टी-ट्वान्टी विश्वकप क्रिकेट : श्रीलंकासँग दक्षिण अफ्रिका पराजित

काठमाडौँ- आईसीसी महिला टी-ट्वान्टी विश्वकप क्रिकेटअन्तर्गत श्रीलंकाले आयोजक दक्षिण अफ्रिकामाथि जित हात पारेको छ । केप टाउनमा शुक्रबार राति भएको उदघाटन खेलमा श्रीलंकाले दक्षिण अफ्रिकालाई ३ रनले पराजित गरेको हो ।

समूह ‘ए’ अन्तर्गत १ सय ३० रनको लक्ष्य पछ्याएको दक्षिण अफ्रिकाले निर्धारित २० ओभरमा ९ विकेट गुमाएर १ सय २६ रन मात्र बनायो । दक्षिण अफ्रिकाका लागि कप्तान सुने लुसले सर्वाधिक २८ तथा लाउरा उल्भार्टले १८ रन जोडे ।

---

श्रीलंकाका लागि इनोका रानाविराले सर्वाधिक ३ तथा सुगन्डिका कुमारी र ओसाडी रानासिंगेले समान २-२ विकेट हात पारे ।

यसअघि टस हारेर पहिले ब्याटिङ गरेको श्रीलंकाले ४ विकेट गुमाउँदै १ सय २९ रन जोड्यो । श्रीलंकाका लागि कप्तान चमिरा अथापथ्थुले सर्वाधिक ६८ रन तथा भिष्मी गुणारत्नेले ३५ रनको योगदान गरे ।