फलोअनमा परेको न्यूजिल्यान्डले इंग्ल्यान्डलाई १ रनले हरायो

काठमाडौँ- घरेलु टोली न्यूजिल्यान्डले इंग्ल्यान्डविरुद्धको टेस्टमा रोमाञ्जक जित हात पारेको छ । फलोअनमा परेको न्यूजिल्यान्डले इंग्ल्यान्डमाथि १ रनको रोमाञ्चक जित हात पारेको हो ।

जितका लागि २ सय ५८ रनको लक्ष्य पछ्याएको इंग्ल्यान्ड २ सय ५६ रनमै समेटियो । जो रुटले ९५ रन जोडेपनि त्यो जितका लागि पर्याप्त भएन ।

---

न्यूजिल्यान्डलाई जित दिलाउन नेल वागनरले सर्वाधिक ४ तथा टिम साउथीले ३ र म्याट हेनरीले २ विकेट लिए ।

यसअघि टस हारेर पहिले ब्याटिङ गरेको इंग्ल्यान्डले ८ विकेट गुमाएर ४ सय ३५ रन जोडेपनि पहिलो इनिङ्स समाप्तीको घोषणा गरेको थियो । उसका लागि ह्यारी ब्रुकले १ सय ८६ रन तथा जो रुटले १ सय ५३ रन जोडेका थिए । न्यूजिल्यान्डका म्याट हेनरीले ४ विकेट लिए ।

जवाफमा न्यूजिल्यान्डले पहिलो इनिङ्समा २ सय ९ रनमै सबै विकेट गुमायो । कप्तान टिम साउथीले ७३ रन जोडे । इंग्ल्यान्डका स्टुआर्ट ब्रोडले ४ तथा जेम्स एन्डरसन र ज्याक लिचले समान ३-३ विकेट हात पारे ।

त्यसपछि इंग्ल्यान्डले न्यूजिल्यान्डलाई फलोअनका लागि निम्तो दिएको थियो । न्यूजिल्यान्डले भने दोस्रो इनिङ्समा उत्कृष्ट पुनरागमन गर्दै ४ सय ८३ रन जोड्यो । केन विलियम्सनले १ सय ३२ रन तथा टोम ब्लन्डेलले ९० रनको योगदान गरे ।

इंग्ल्यान्डका ज्याक लिचले सर्वाधिक ५ विकेट लिए ।