के सन्दीपलाई समेट्नैपर्ने भएर मौसम घाइते भएका हुन् ?

काठमाडौँ- युनाइटेड अरब इमिरेट्स (युएई)मा जारी आईसीसी पुरुष क्रिकेट विश्वकप लिग-२ अन्तर्गतको एकदिवसीय अन्तर्राष्ट्रिय सिरिजका लागि सन्दीप लामिछानेलाई टिममा समेटिएको छ ।

नेपाल क्रिकेट संघ (क्यान)ले बुधबार सन्दीपलाई टिममा राखिएको जानकारी गराएको हाे । सर्वोच्च अदातलले विदेश जान अनुमति दिएलगत्तै क्यानले आईसीसीसँग सन्दीपलाई टिममा राख्न औपचारिक रूपमा अनुरोध गरेको थियो ।

---

सिरिजअन्तर्गत भोलि (बिहीबार) नेपालले आयोजक युएईसँग खेल्दैछ । सन्दीप भने बुधबार नै युएईतर्फ प्रस्थान गरेका छन् ।

तर, सन्दीपलाई टिममा समेट्दा क्यानले भने टिमका बलर श्याम (मौसम) ढकाल घाइते भएको जानकारी गराएको छ । उनी अभ्यासका क्रममा मंगलबार घाइते भएको क्यानले जानकारी गराएको छ ।

तर, आईसीसीले सन्दीपलाई टिममा राख्न अनुमति नदिँदासम्म भने क्यानले मौसम घाइते भएको कुनै जानकारी गराएको थिएन । अर्कोतर्फ २२ वर्षीय मौसमले अहिलेसम्म राष्ट्रिय टिममा डेब्यू गरिसकेका छैनन् ।