क्रिकेट लिग-२: पीएनजीविरुद्ध नेपालले पहिले बलिङ गर्ने

काठमाडौँ- युनाइटेड अरब इमिरेट्स (युएई) मा जारी आईसीसी पुरुष क्रिकेट विश्वकप लिग-२ अन्तर्गतको एकदिवसीय अन्तर्राष्ट्रिय सिरिजमा नेपालले पपुवा न्यूगिनी (पीएनजी) विरुद्ध पहिले बलिङ गर्ने भएको छ ।

दुबई इन्टरनेसनल स्टेडियममा पीएनजीले टस जितेर पहिले ब्याटिङ गर्ने निर्णय गरेपछि नेपाल बलिङमा उत्रने भएको हो । सिरिजअन्तर्गत नेपालले पीएनजीसँग दोस्रो पटक खेल्न लागेको हो ।

---

यसअघिको पहिलो खेलमा नेपालले पीएनजीलाई ४ विकेटले पराजित गरेको थियो । तर पीएनजीले भने युएईलाई १ सय ३१ रनले पराजित गरेको थियो । अर्कोतर्फ दोस्रो खेलमा भने नेपालले बिहीबार युएईसँग ६८ रनको पराजय भोग्यो ।

लिग-२ अन्तर्गत यो नेपाल र पीएनजी दुबैका लागि ३१ औँ खेल हुनेछ । यसअघि ३० खेलबाट २८ अंक जोडेको नेपाल छैटौ स्थान तथा ७ अंक जोडेको पीएनजी पुछारमा रहेका छन् । युएई भने ३१ अंकसहित पाँचौ स्थानमा छ ।