काठमाडौँ– ​नेपालमा जारी आईसीसी पुरुष क्रिकेट विश्वकप लिग–२ अन्तर्गतको एकदिवसीय अन्तर्राष्ट्रिय सिरिजमा नेपालले पपुवा न्यूगिनी (पीएनजी) लाई २९८ रनको लक्ष्य दिएको छ । नेपालले ४९.१ ओभरमा सबै विकेट गुमाएर २९७ रन बनाएको हो ।

२९८ रनको लक्ष्य तयार गर्न नेपालका लागि ओपनर ब्याटर आशिफ शेखले शतकिय पारी खेले । उनले ११० बलमा २ छक्का र १२ चौका हान्दै ११० रन बनाएका छन् । यस्तै कुशल भूर्तेलले ४५, भिम सार्कीले ४४, रोहित पौडेलले ३०, आरिफ शेखले १५, ज्ञानेन्द्र मल्लले ११, करण केसीले ८, सन्दिप लामिछानेले ७, सोपपाल कामीले ४, र कुशल मल्लले २ रन बनाए ।

---

टस जितेर पहिले फिल्डिङ गरेको पीएनजीले नेपाललाई २९७ रनमा रोक्नका लागि सेमो कमियाले सर्वाधिक ५ विकेट लिए । कमियाले ९.१ ओभरमा ३८ रन खर्चिएर ५ विकेट लिएका हुन् ।  रिले हिकुरीले ३ विकेट लिए । १० ओभर बलिङ गरेका हिकुरेले ५० रन खर्चिएर ३ विकेट लिएका हुन् । यस्तै एली नाओले १ विकेट लिएका छन् ।