एसीसी प्रिमियर कपः ओमानको दोस्रो जित

काठमाडौँ- नेपालमा जारी एसीसी प्रिमियर कप क्रिकेट प्रतियोगितामा ओमानले दोस्रो जित हात पारेको छ । समूह ‘ए’ अन्तर्गत मुलपानी क्रिकेट मैदानमा आइतबार भएको खेलमा ओमानले मलेसियालाई ८ विकेटले हराउँदै दोस्रो जित दर्ता गरेको हो ।

जितका लागि चाहिएको २ सय २८ रनको लक्ष्य ओमानले ४१ ओभर ४ बलमा २ विकेट गुमाएर पूरा गर्‍यो । ओमानको जितमा जतिन्दर सिंहले १ सय १ रन बनाए । कश्यप प्रजापतिले ६६ रन तथा कप्तान जिसन मक्सुदले ५२ रनको योगदान गरे । मलेसियाका लागि मुहम्मद अमिरले दुबै विकेट लिए ।

---

यसअघि टस हारेर पहिले ब्याटिङ गरेको मलेसियाले निर्धारित ५० ओभरमा ९ विकेट गुमाएर २ सय २७ रन बनायो । मलेसियाका लागि विरणदिप सिंहले ९४ तथा मुहम्मद स्याहादतले ५५ रन जोडे ।

ओमानका लागि जिसन मक्सुदले सर्वाधिक ४ तथा विलाल खान र अयान खानले २-२ विकेट हात पारे ।