एसीसी प्रिमियर कपः नेपाल र कुवेतबीचको सेमिफाइनल शनिबार

काठमाडौँ- एसीसी प्रिमियर कप क्रिकेट प्रतियोगिताअन्तर्गत नेपाल र कुवेतबीचको सेमिफाइनल खेल शनिबार हुने भएको छ । नेपाल र कुवेतबीचको खेल कीर्तिपुरस्थित त्रिवि क्रिकेट मैदानमा विहान ९ बजेबाट सुरु हुनेछ ।

नेपाल समूह ‘ए’ को विजेता तथा कुवेत समूह ‘बी’ को उपविजेताको रुपमा अन्तिम चारमा प्रवेश गरेका हुन् । नेपालले समूह चरणमा ३ खेलमा जित हात पार्दा एक खेलमा वर्षाका कारण अंक बाँडेको थियो । कुवेतले भने ४ मध्ये ३ खेलमा जित हात पार्दा एक खेलमा पराजय भोगेको थियो ।

---

यता शनिबार नै मुलपानी क्रिकेट मैदानमा हुने अर्को सेमिफाइनल खेलमा ओमानले युनाइटेड अरब इमिरेट्स (यूएई) को सामना गर्नेछ । ओमान समूह ‘ए’ उपविजेता तथा यूएई समूह ‘बी’ को विजेताको रुपमा सेमिफाइनलमा प्रवेश गरेका हुन् ।

दुबै सेमिफाइनल खेलका विजेताले सोमबार फाइनल खेल्नेछन् । सेमिफाइनलमा पराजित हुने टोलीले आइतबार तेस्रो स्थानको लागि खेल्ने तालिका रहेको छ ।