६ वटा शतक प्रहार भएको आयरल्यान्डविरुद्धकाे टेस्ट खेल श्रीलंकाले जित्यो

काठमाडौँ- घरेलु टोली श्रीलंकाले आयरल्यान्डविरुद्धको दोस्रो टेस्ट खेल पनि जितेको छ । ६ वटा शतक प्रहार भएको दोस्रो टेस्ट जित्दै श्रीलंकाले दुई खेलको टेस्ट सिरिज पनि २-० ले जितेको छ । दोस्रो तथा अन्तिम खेल श्रीलंकाले एक इनिङ्स तथा १० रनले जितेको हो ।

पहिलो इनिङ्समा २ सय १२ रनले पछि परेको आयरल्यान्डले दोस्रो इनिङ्समा २ सय २ रनमात्र जोड्न सक्यो । दोस्रो इनिङ्समा आयरल्यान्डका लागि ह्यारी टेक्टरले सर्वाधिक ८५ रन बनाए । श्रीलंकाका रमेश मेन्डिसले सर्वाधिक ५ विकेट हात पारे ।

---

यसअघि टस जितेर पहिले ब्याटिङ गरेको आयरल्यान्डले पहिलो इनिङ्समा भने ४ सय ९२ रन जोडेको थियो । आयरल्यान्डका लागि पल स्टिरिलिङले १ सय ३ तथा कर्टिस क्याम्फरले १ सय ११ रन बनाए । श्रीलंकाका प्रभाथ जयसुरियाले सर्वाधिक ५ विकेट लिए ।

श्रीलंकाले भने ३ विकेटको क्षतिमा ७ सय ४ रन बनाउँदै पहिलो इनिङ्स समाप्तीको घोषणा गरेको थियो । श्रीलंकाका लागि कुशल मेन्डिसले २ सय ४५ रन तथा निशान माडुसकाले २ सय ५ रन जोडे । त्यसैगरी, कप्तान दिमुथ करुणारत्नेले १ सय १५ रन र एन्जेलो म्याथ्यूजले एक सय रन बनाए ।