काठमाडौँ- एसीसी प्रिमियर कप क्रिकेट प्रतियोगिताको फाइनलमा नेपालले सोमबार युनाइटेड अरब इमिरेट्स (यूएई) विरुद्ध खेल्दैछ । नेपाल र यूएईबीचको खेल कीर्तिपुरस्थित त्रिवि क्रिकेट मैदानमा विहान ९ बजेबाट सुरु हुने तालिका रहेको छ ।

तर कम्तिमा पनि मंगलबारसम्म काठमाडौमा वर्षा हुने पूर्वानुमान गरिएको छ । प्रतियोगिताको फाइनलका लागि मंगलबारलाई ‘रिजर्भ डे’ को रुपमा राखिएको छ । यदि वर्षाका कारण सोमबार खेल हुन नसके मंगलबार खेलाइने तालिका छ ।

---

तर मंगलबार पनि वर्षाले खेल प्रभावित बने सुपर ओभर खेलाइनेछ । पहिलो सुपर ओभरमा पनि नतिजा नआए दोस्रो सुपर ओभर खेलाइने नेपाल क्रिकेट संघ (क्यान) ले जनाएको छ ।

यदि दोस्रो सुपर ओभरबाट पनि विजेताको टुंगो नलागे प्रतियोगिताको वरीयतामा शीर्ष स्थान ओगट्ने टोली विजेता घोषित हुने पनि क्यानले उल्लेख गरेको छ ।

समूह चरणमा भने नेपालले खेलेका चारमध्ये ३ खेलमा जित हात पार्दा एक खेलमा अंक बाँडेको थियो र सेमिफाइनलमा समूह विजेताको रुपमा पुगेको थियो । समूह चरणमा नेपाल अपराजित रहेको थियो । वर्षाका कारण खेल हुने नसकेपछि कुवेतविरुद्धको सेमिफाइनलमा पनि नेपालले सोही आधारमा जितेको थियो ।

अर्कोतर्फ यूएईले भने समूह चरणमा एक खेलमा पराजय भोगेको थियो । उसले भने डिएल मेथडबाट ओमानलाई पछि पार्दै फाइनलको यात्रा तय गरेको थियो ।

अहिलेको अवस्थामा नेपाल प्रतियोगिताको वरीयतामा शीर्ष स्थानमा छ र एसिया कपका लागि छनोट हुने स्थानमा छ ।