आईपीएलः राजस्थानमाथि गुजरातको शानदार जित

काठमाडौँ- इन्डियन प्रिमियर लिग (आईपीएल) मा साविक विजेता गुजरात टाइटन्सले राजस्थान रोयल्समाथि शानदार जित हात पारेको छ । शुक्रबार राति जयपुरमा भएको खेलमा गुजरातले राजस्थानलाई ९ विकेटले पराजित गर्‍यो ।

जितसँगै १० मध्ये ७ खेलमा जित हात पार्दै १४ अंकसहित गुजरात प्लेअफ नजिक पुगेको छ । यता राजस्थानले भने १० खेलमा पाँचौ पराजय भोगेको हो । उसले ५ जितसहित १० अंक जोडेको छ ।

---

शुक्रबार राति १ सय १९ रनको सामान्य लक्ष्य गुजरातले १३ ओभर ५ बलमा केवल १ विकेट गुमाउँदै पूरा गर्‍यो । गुजरातको जितमा रिद्धिमान साहाले ४१ रन, शुबमन गिलले ३६ तथा कप्तान हार्दिक पाण्ड्याले ३९ रनको योगदान गरे ।

यसअघि टस जितेर पहिले ब्याटिङ रोजेको राजस्थानले १७ ओभर ५ बलमा सबै विकेट गुमाउँदै १ सय १८ रनमात्र जोड्न सक्यो । उसका लागि सन्जु सामसनले सर्वाधिक ३० रन बनाए ।

गुजरातका लागि राशिद खानले सर्वाधिक ३ तथा नुर अहमदले २ विकेट हात पारे ।

आईपीएलमा शनिबार दुई खेल हुने तालिका रहेको छ । पहिलो खेल चेन्नई सुपर किंग्स तथा मुम्बई इन्डियन्सबीच हुनेछ । दोस्रो खेल दिल्ली क्यापिटल्स र रोयल च्यालेन्जर्स बैंग्लोरबीच हुने तालिका रहेको छ ।