आईपीएलः जैसवाल र चहलको कीर्तिमान

काठमाडौँ- राजस्थान रोयल्सका ब्याट्सम्यान यशस्वी जैसवाल र बलर युजवेन्द्र चहलले इन्डियन प्रिमियर लिग (आईपीएल) मा कीर्तिमान कायम गरेका छन् ।

जारी सिजनमा बिहीबार राति इडेन गार्डेनमा भएको खेलमा कलकता नाइट राइटर्सविरुद्ध राजस्थानका जैसवाल र चहलले कीर्तिमान कायम गरेका हुन् ।

---

जैसवालले आईपीएलकै इतिहासमा सर्वाधिक छिटो अर्धशतक पूरा गरे । कलकताविरुद्ध राजस्थानलाई ९ विकेटको जित दिलाउँदा जैसवालले १३ बलमै अर्धशतक पूरा गरे । यसअघि केएल राहुल र प्याट कमिन्सले समान १४ बलमा अर्धशतक हिर्काएका थिए ।

राजस्थानले १ सय ५० रनको लक्ष्य १३ ओभर १ बलमा पूरा गर्दा जैसवालले ४७ बलमा अविजित ९८ रन बनाउँदा १२ चौका र ५ छक्का हिर्काए ।

यसअघि टस हारेर पहिले ब्याटिङ गरेको कलकताले निर्धारित २० ओभरमा ८ विकेटको क्षतिमा १ सय ४९ रन बनाएको थियो । कलकताका लागि भेन्कटेस ऐयरले सर्वाधिक ५७ रन बनाए ।

राजस्थानका युजवेन्द्र चहलले सर्वाधिक ४ विकेट हात पारे । यससँगै चहल आईपीएलमा सर्वाधिक विकेट लिने खेलाडी बनेका छन् । उनले १ सय ८४ विकेट हात पारेका छन् । उनले ड्वायन ब्राभोलाई पछि पारेका हुन् ।