आईपीएलः मुम्बईलाई पराजित गर्दै लखनउ प्लेअफ नजिक

काठमाडौँ- मुम्बई इन्डियन्समाथि रोमाञ्चक जित हात पार्दै लखनउ सुपर जायन्ट्स इन्डियन प्रिमियर लिग (आईपीएल) को प्लेअफ नजिक पुगेको छ । मंगलबार राति घरेलु मैदानमा मुम्बईमाथि ५ रनको जित हात पार्दै लखनउ प्लेअफ नजिक पुगेको हो ।

१३ मध्ये ७ खेलमा जित, पाँच खेलमा हार तथा एक खेलमा अंक बाँडेको लखनउ १५ अंकसहित तालिकाको तेस्रो स्थानमा छ । प्लेअफमा पुगिसकेको साविक विजेता गुजरात टाइटन्सको १८ हुँदा नेट रनरेटका आधारमा दोस्रो स्थानको चेन्नईको पनि १५ अंक छ । मुम्बई भने १४ अंकसहित चौँथो स्थानमा छ ।

---

मंगलबार रातिको खेलमा १ सय ७८ रनको लक्ष्य पछ्याएको मुम्बईले निर्धारित २० ओभरमा ५ विकेट गुमाउँदै १ सय ७२ रनमात्र जोड्न सक्यो । मुम्बईका लागि इशान किसनले सर्वाधिक ५९ रन तथा कप्तान रोहित शर्माले ३७ रन बनाए । लखनउका लागि यश ठाकुर तथा रवि विश्नोइले समान २-२ विकेट लिए ।

यसअघि टस हारेर पहिले ब्याटिङ गरेको लखनउले ३ विकेटको क्षतिमा १ सय ७७ रन जोड्यो । लखनउका लागि मार्कस स्टोइनिसले ४७ बलमा ८ छक्का तथा ४ चौकाको मदतमा अविजित ८९ रन बनाए । कप्तान क्रुनाल पाण्ड्याले ४९ रन बनाए ।

आईपीएलमा आज पञ्जाब किंग्सले दिल्ली क्यापिटल्सको सामना गर्नेछ ।