विश्वकप छनोटअघि नेपालले यूएई र ओमानसँग अभ्यास खेल खेल्ने

काठमाडौँ- जिम्बाब्वेमा जुन १८ देखि जुलाई ९ तारिखसम्म आयोजना हुने आईसीसी पुरुष क्रिकेट विश्वकप छनोटअघि नेपालले दुई अभ्यास खेल खेल्ने भएको छ ।

आयोजक क्रिकेट जिम्बाब्वेले जनाएअनुसार छनोटअघि जुन १३ तारिखमा यूएई तथा जुन १५ मा ओमानविरुद्ध अभ्यास खेल खेल्ने भएको हो ।

---

छनोटअन्तर्गत नेपाल समूह ‘ए’ मा रहेको छ । यसमा जिम्बाब्वेसँगै, वेस्ट इन्डिज, नेदरल्यान्ड्स र अमेरिका पनि रहेका छन् । समूह ‘बी’ मा भने श्रीलंका, आयरल्यान्ड, स्कटल्यान्ड, ओमान र यूएई रहेका छन् ।

विश्वकप छनोटअन्तर्गत नेपालले पहिलो खेल आयोजक जिम्बाब्वेविरुद्ध जुन १८ तारिखमा खेल्ने तालिका छ । नेपालले समूह चरणको दोस्रो खेल अमेरिकाविरुद्ध जुन २०, तेस्रो खेल टेस्ट राष्ट्र तथा दुई पटकको विजेता वेस्ट इन्डिजसँग जुन २२ तथा चौँथो खेल नेदरल्यान्ड्ससँग जुन २४ मा खेल्ने छ ।

विश्वकप छनोटबाट दुई टोलीले भारतमा यसै वर्ष हुने एकदिवसीय विश्वकपमा स्थान सुरक्षित गर्नेछन् ।