टी-ट्वान्टीमा नेपालले मंगोलियालाई पराजित गर्दा कीर्तिमानको ओइरो

काठमाडौँ- चीनको हान्झाउमा जारी १९ औँ एसियन गेम्सअन्तर्गत पुरुषको क्रिकेटमा नेपालले मंगोलियालाई पराजित गर्दा कीर्तिमानको ओइरो लागेको छ ।

नेपालले मंगोलियालाई २ सय ७३ रनले पराजित गरेको हो । टी-ट्वान्टी अन्तर्राष्ट्रियमा रनका हिसाबले नेपालले मंगोलियामाथि हात पारेको पहिलो ठूलो जित हो । यसअघि चेक रिपब्लिकले टर्कीलाई २ सय ५७ रनले हराएको थियो ।

---

बुधबार नेपालले दिएको ३ सय १५ रनको लक्ष्य पछ्याएको मंगोलियाले १३ ओभर १ बलमा सबै विकेट गुमाएर ४१ रन मात्र बनायो । मंगोलियालाई सस्तैमा समेट्न नेपालका करण केसी, अविनाश बोहरा र सन्दीप लामिछानेले समान २-२ विकेट हात पारे ।

यसअघि टस हारेर पहिले ब्याटिङ गरेको नेपालले निर्धारित २० ओभरमा केवल ३ विकेट गुमाएर ३ सय १४ रन बनायो ।

टी-ट्वान्टी अन्तर्राष्ट्रियमा कुनै पनि टिमले बनाएको यो सर्वाधिक रन हो । यसअघि अफगानिस्तानले आयरल्यान्डविरुद्ध २ सय ७८ रन बनाएको थियो ।

मंगोलियाविरुद्ध नेपालका कुशल मल्लले ५० बलमा अविजित रहँदै १ सय ३७ रन बनाउँदा १२ छक्का र ८ चौका हिर्काए । कुशल मल्लले ३४ बलमै शतक पूरा गर्दै विश्व कीर्तिमान कायम गरे । यसअघि दक्षिण अफ्रिकाका डेभिड मिलर, भारतका रोहित शर्मा र रोमानियाका विक्रमासेकाराले ३५ बलमा शतक पूरा गरेका थिए ।

यता कप्तान रोहित पौडेलले २७ बलमा २ चौका र ६ छक्काको मदतमा ६१ रन जोडे ।

त्यसैगरी, दिपेन्द्र सिंह ऐरीले १० बलमा ५२ रन जोड्दा ८ छक्का प्रहार गरे । उनले ९ बलमै अर्धशतक पूरा गरे ।

दिपेन्द्रले टी-ट्वान्टी अन्तर्राष्ट्रियमा सबैभन्दा कम बलमा अर्धशतक पूरा गर्ने विश्व कीर्तिमान कायम गरेका छन् । दिपेन्द्रले भारतीय पूर्व क्रिकेटर युवराज सिंहको कीर्तिमान तोडेका छन् । युवराजले इंग्ल्यान्डविरुद्ध १२ बलमा अर्धशतक पूरा गरेका थिए ।