कर्णालीमाथि बागमती ७ विकेटले विजयी

काठमाडौँ - बागमती प्रदेशले कर्णाली प्रदेशलाई ७ विकेटले पराजित गरेको छ । जारी पीएम कप अन्तर्गत सोमबार सम्पन्न खेलमा कर्णाली प्रदेशले दिएको ७९ रनको लक्ष्य पछ्याएको बागमती प्रदेशले १३ ओभरमा ३ विकेट गुमाउदै लक्ष्य पुरा गरेको हो ।

यस अघि मुलपानी मैदानमा कर्णालीले पहिला ब्याटिंग गर्दै २४.२ ओभरमा केवल ७८ रनमा अल आउट भएको थियो । कर्णाली प्रदेशका लागि अर्जुन घर्तिले सर्वाधिक २३ रन बनाए भने निश्चल रावलले १३ रन बनाएका थिए । कर्णालीका अन्य ब्याट्सम्यानले यस खेलमा दोहोरो अंकमा रन बनाउन सकेनन् ।

---

कर्णालीको ब्याटिंग लाइन ध्वस्त गर्ने क्रममा बागमतीका बलर रिजन ढकालले सर्वाधिक ५ विकेट लिएका थिए । त्यस्तै क्रिजन गुरुङले २ विकेट लिए भने प्रतिश जिसी, सुर्य तामाङ र विपिन आचार्यले एक एक विकेट लिएका छन् ।

यो जितपछि बागमती प्रदेशको ६ खेलमा ८ अंक भएको छ र अंक तालिकामा शीर्ष स्थानमा उक्लिएको छ । त्यस्तै कर्णाली प्रदेशले भने तेस्रो हार बेहोरेको छ । ५ खेलमा ४ अंक भएको कर्णाली सातौं स्थानमा छ ।