प्रदिपले ६ विकेट लिएपछि लुम्बिनीमाथि मधेशको रोमाञ्चक जित

काठमाडौँ- पीएम कप पुरुष राष्ट्रिय क्रिकेट प्रतियोगितामा मधेश प्रदेशले लुम्बिनी प्रदेशमाथि रोमाञ्चक जित हात पारेको छ । काठमाडौँको मुलपानी क्रिकेट मैदानमा आइतबार भएको खेलमा मधेशले लुम्बिनीलाई ९ रनले पराजित गरेको हो ।

१ सय ७० रनको विजयी लक्ष्यसहित मैदानमा उत्रिएको लुम्बिनीले जितका लागि १० रन आवश्यक हुँदा सबै विकेट गुमाउन पुगेको हो । लुम्बिनीले ४० ओभर ५ बलमा सबै विकेट गुमाउँदा १ सय ६० रनमात्र बनाउन सक्यो ।

---

लुम्बिनीका लागि प्रज्वल थापाले ६२ रन बनाए पनि जितका लागि पर्याप्त भएन । लुम्बिनीलाई रोक्न मधेशका लागि प्रदिप पासवानले सर्वाधिक ६ विकेट हात पारे ।

अभिषेक तिवारीले २ तथा हरिशंकर शाह र रुपेश सिंहले १-१ विकेट हात पारे ।

यसअघि टस हारेर पहिले ब्याटिङ गरेको मधेशले ४१ ओभर ३ बलमा सबै विकेटको क्षतिमा १ सय ६९ रन बनाएको थियो । मधेशका लागि अरनिको यादवले सर्वाधिक ३८ रन बनाए ।

लुम्बिनीका लागि विर मगरले ४ तथा अभिषेक गौतमले ३ विकेट हात पारे ।