कर्णालीसँग एपीएफ स्तब्ध हुँदा आशिफ शेखको शतक गयो खेर

काठमाडौँ- आशिफ शेखले शतक बनाए पनि नेपाल एपीएफ क्लब पीएम कप पुरुष राष्ट्रिय क्रिकेट प्रतियोगितामा कर्णाली प्रदेशसँग स्तब्ध हुन पुगेको छ ।

कीर्तिपुरस्थित त्रिवि क्रिकेट मैदानमा बुधबार भएको खेलमा कर्णाली प्रदेशले एपीएफलाई २१ रनले पराजित गरेको हो ।

---

पराजयसँगै एपीएफ प्रतियोगिताबाट बाहिरिएको छ । एपीएफले लिग चरणका ९ मध्ये ४ खेलमा पराजय भोग्दै केवल १० अंकमात्र जोड्न सक्यो । एपीएफको पराजयसँगै त्रिभुवन आर्मी क्लब भने १२ अंकसहित फाइनलमा पुगेको छ । १४ अंक जोडेको नेपाल पुलिस भने यसअघि नै फाइनलमा पुगिसकेको थियो ।

बुधबारको खेलमा कर्णालीले दिएको २ सय ७ रनको लक्ष्य पछ्याएको एपीएफले ४४ ओभरमा सबै विकेट गुमाएर १ सय ८५ रनमात्र बनाउन सक्यो ।

एपीएफका लागि आशिफ शेखले १ सय १६ बलमा १० चौका र २ छक्काको मदतमा १ सय ८ रन बनाए पनि जितका लागि पर्याप्त भएन । अमर रौटेलाले २८ रन जोडे ।  

कर्णालीलाई जित दिलाउन प्रकाश जैसीले ४ तथा उनिश सिंह र दिपेन्द्र रावतले समान २-२ विकेट हात पारे ।

यसअघि टस हारेर पहिले ब्याटिङ गरेको कर्णालीले ४४ ओभर १ बलमा सबै विकेट गुमाउँदै २ सय ६ रन बनायो । कर्णालीका लागि हिमान्शु शाहीले ६२ रन तथा अर्जुन घर्तीले ५३ रन बनाए ।

एपीएफका लागि मौसम ढकालले ३ तथा अमर रौटेलाले २ विकेट हात पारे ।