गिलले ११ महिनापछि हिर्काए टेस्ट क्रिकेटमा पहिलो शतक

काठमाडौँ- भारतीय क्रिकेट टिमका ब्याटर शुबमन गिलले टेस्ट क्रिकेटमा ११ महिनापछि पहिलो शतक प्रहार गरेका छन् ।

पाहुना टोली इंग्ल्यान्डविरुद्धको दोस्रो टेस्ट खेलका क्रममा गिलले शतक पूरा गरेका हुन् । खेलको दोस्रो इनिङ्समा गिलले १ सय ४७ बलमा ११ चौका र २ छक्का हिर्काउँदै १ सय ४ रन बनाए ।

---

२२ औँ टेस्ट खेलिरहेका गिलको यो टेस्टमा तेस्रो शतक हो । गिलले अन्तिम पटक सन् २०२३ को मार्चमा अस्ट्रेलियाविरुद्ध शतक पूरा गरेका थिए ।

त्यसपछि १२ इनिङ्समा गिलले अर्धशतक समेत पूरा गर्न सकेका थिएनन् ।