मनमोहन मेमोरियल यू-१६ क्रिकेट प्रतियोगिता माघ २८ देखि

काठमाडौँ- तेस्रो संस्करणको मनमोहन मेमोरियल यू-१६ राष्ट्रिय क्रिकेट प्रतियोगिता यही माघ २८ गतेबाट हुने भएको छ ।

आयोजक मनमोहन मेमोरियल क्रिकेट सेन्टरले बुधबार काठमाडौँमा पत्रकार सम्मेलनमार्फत प्रतियोगिताबारे जानकारी गराएको हो ।

---

आयोजकका अनुसार प्रतियोगिता माघ २८ देखि फागुन ७ गतेसम्म पोखरा रंगशालामा हुने भएको हो ।

नेपाल क्रिकेट संघ (क्यान) को वार्षिक क्यालेन्डरमा परेको प्रतियोगितामा सात प्रदेश र आयोजकको टिमको सहभागिता रहनेछ ।

२५ ओभरको प्रतियोगिताका लागि सहभागी ८ टिमलाई २ समूहमा विभाजन गरिएको छ । समूह 'ए' मा कोशी प्रदेश, बागमती प्रदेश, गण्डकी प्रदेश र कर्णाली प्रदेश रहेका छन् । समूह 'बी' मा मधेश प्रदेश, लुम्बिनी प्रदेश, सुदूरपश्चिम प्रदेश र आयोजक मनमोहन मेमोरियल-११ रहेका छन् ।

समूह चरणको खेलपछि दुवै समूहमा समान २-२ टिम सेमिफाइनलमा पुग्नेछन् । फाइनल भने फागुन ७ गते हुने तालिका रहेको छ ।

मनमोहन मेमोरियल क्रिकेट सेन्टरका अध्यक्ष ठाकुर गैरेका अनुसार प्रतियोगिताले क्रिकेट प्रतिभा पहिचान र विकासका लागि महत्वपूर्ण भूमिका निर्वाह गर्ने विश्वास व्यक्त गरे । गैरेले प्रतियोगिता प्रत्येक वर्ष आयोजना हुने समेत बताए ।

उनका अनुसार तेस्रो संस्करणको प्रतियोगिताका लागि करिब ४५ लाख खर्च हुने अनुमान गरिएको छ ।