एसीसी प्रिमियर कपः नेपाल सेमिफाइनलमा, मलेसियासँग खेल्ने

काठमाडौँ- नेपालले मलेसियामा जारी एसीसी महिला प्रिमियर कप टी-ट्वान्टी क्रिकेट प्रतियोगिताको सेमिफाइनलमा स्थान सुरक्षित गरेको छ ।

बुधबार भएको क्वार्टरफाइनल खेलमा कुवेतलाई ८ विकेटले पराजित गर्दै नेपाल सेमिफाइनलमा प्रवेश गरेको हो । नेपालले अब फाइनल प्रवेशका लागि मलेसियाको सामना गर्नेछ । मलेसियाले भने जापानलाई पराजित गर्दै अन्तिम ४ को यात्रा तय गरेको हो ।

---

बुधबारको खेलमा डीएल मेथडअनुसार पाएको ५० रनको लक्ष्य नेपालले ६ ओभर ५ बलमा केवल दुई विकेट गुमाएर पूरा गर्‍यो । नेपालको जितमा कप्तान इन्दु बर्माले २२ तथा सिता राना मगरले १७ रनको योगदान गरे ।

यसअघि टस जितेर पहिले ब्याटिङ रोजेको कुवेतले निर्धारित २० ओभरमा ९ विकेट गुमाउँदै ७३ रन बनायो ।

कुवेतका लागि प्रियादा मुरालीले सर्वाधिक २९ रन जोडिन् । शान्थि बालासुब्रमनियन र खाजिदा खलिलले समान १३-१३ रनको योगदान गरे ।

नेपालका लागि सिता राना मगरले ३ विकेट तथा कविता कुँवरले र रुविना क्षेत्री २-२ विकेट हात पारे । सिताले ह्याट्रिक समेत पूरा गरेकी थिइन् । उनले १३ औँ ओभरमा ह्याट्रिक पूरा गरेकी हुन् ।