क्रिकेट लिग-२ को पहिलो सिरिज भोलिबाट, नेपाल र नामिबिया भिड्दै

काठमाडौँ- आईसीसी पुरुष क्रिकेट विश्वकप लिग-२ को पहिलो सिरिज भोलिबाट नेपालमा सुरु हुँदैछ ।

पहिलो सिरिजको पहिलो खेल भने नेपाल र नामिबियाबीच कीर्तिपुरस्थित त्रिवि क्रिकेट मैदानमा भोलि बिहान ९:१५ बजेबाट सुरु हुने तालिका रहेको छ ।

---

नेपालमा हुने एकदिवसीय अन्तर्राष्ट्रिय सिरिजमा नेपालसँगै नामिबिया र नेदरल्यान्ड्सको सहभागिता रहेको छ ।

नामिबियापछि नेपालले दोस्रो खेल नेदरल्यान्ड्सविरुद्ध फेब्रुअरी १७, तेस्रो खेल नामिबियासँगै फेब्रुअरी २१ तथा चौँथों खेल नेदरल्यान्ड्सविरुद्ध फेब्रुअरी २५ मा खेल्ने तालिका रहेको छ ।

लिग-२ मा नेपाल, क्यानाडा, नामिबिया, नेदरल्यान्ड्स, ओमान, स्कटल्यान्ड, युनाइटेड अरब इमिरेट्स र अमेरिकाको सहभागिता हुनेछ ।

लिग-२ अन्तर्गत २४ वटा सिरिज तथा जम्मा १ सय ४४ एकदिवसीय अन्तर्राष्ट्रिय खेल हुने आईसीसीले जनाएको छ ।

लिग-२ को अन्त्यमा शीर्ष ४ टिम सन् २०२७ को एकदिवसीय विश्वकपको लागि हुने छनोटमा स्थान सुरक्षित गर्नेछन् ।

पुछारका ४ टिमले भने विश्वकप छनोट प्लेअफ खेल्नुपर्नेछ ।