पाँचौँ टेस्टमा इंग्ल्यान्डविरुद्ध भारत एक इनिङ्स र ६४ रनले विजयी

काठमाडौँ- घरेलु टोली भारतले इंग्ल्यान्डविरुद्धको पाँच खेलको टेस्ट सिरिजको अन्तिम खेल एक इनिङ्स तथा ६४ रनले आफ्नो पक्षमा पारेको छ ।

धरमशालामा शनिबार सम्पन्न खेलसँग भारतले सिरिज ४-१ ले आफ्नो पक्षमा पारेको छ ।

---

पाँचौँ तथा अन्तिम खेलको दोस्रो इनिङ्समा इंग्ल्यान्ड १ सय ९५ रनमै सीमित भएपछि भारतले शानदार जित हात पारेको हो ।

दोस्रो इनिङ्समा इंग्ल्यान्डका लागि जो रुटले सर्वाधिक ८४ रन बनाउँदा भारतका रविचन्द्रन आश्विनले सर्वाधिक ५ विकेट हात पारे ।

यसअघि टस जितेर पहिला ब्याटिङ गर्ने निर्णय गरेको इंग्ल्यान्डले पहिलो इनिङ्समा २ सय १८ रन बनाएको थियो । इंग्ल्यान्डका लागि ज्याक क्रलीले सर्वाधिक ७९ रन बनाए भने भारतका कुलदिप यादवले ५ तथा रविचन्द्रन आश्विनले ४ विकेट हात पारे ।

भारतले भने पहिलो इनिङ्समा ४ सय ७७ रन जोड्दा शुवमन गिलले १ सय १० तथा कप्तान रोहित शर्माले १ सय ३ रनको योगदान गरे ।

इंग्ल्यान्डका शोएब बसिरले ५ विकेट लिए । २ विकेट हात पारेका जेम्स एन्डरसनले टेस्ट क्रिकेटमा ७ सय विकेट समेत पूरा गरे ।