ललितपुर मेयर्स कपः बागमतीविरुद्ध ललितपुर मेयर्सको शानदार जित

काठमाडौँ- ललितपुर मेयर्स कप महिला क्रिकेट प्रतियोगिताअन्तर्गत आयोजक ललितपुर मेयर्स-११ ले शानदार जित हात पारेको छ ।

कीर्तिपुरस्थित त्रिवि क्रिकेट मैदानमा शनिबार भएको खेलमा ललितपुर मेयर्स-११ ले बागमती प्रदेशलाई ७ विकेटले पराजित गरेको हो ।

---

जितका लागि चाहिएको ५३ रनको लक्ष्य ललितपुर मेयर्स-११ ले १३ ओभर १ बलमा केवल ३ विकेट गुमाएर पूरा गर्‍यो ।

ललितपुर मेयर्स-११ को जितमा कप्तान पुजा महतोले अविजित २३ रन जोडिन् । लक्ष्मी चौधरीले १२ रनको योगदान गरिन् । बागमतीका लागि खुसी डंगोलले १ विकेट हात पारिन् ।

यसअघि टस जितेर पहिले ब्याटिङ गरेको बागमतीले १४ ओभर २ बलमा सबै विकेट गुमाएर ५२ रन बनायो । बागमतीका लागि कप्तान अस्मिना कर्माचार्यले सर्वाधिक २० रन बनाइन् ।

ललितपुर मेयर्स-११ का लागि कृतिका मरासिनीले ४ तथा सरस्वती कुमारीले ३ र पुजा महतोले २ विकेट हात पारे ।