टी-ट्वान्टी सिरिजमा पाकिस्तानमाथि इंग्ल्यान्डको जित

काठमाडौँ- घरेलु टोली इंग्ल्यान्डले पाकिस्तानविरुद्धको चार खेलको टी-ट्वान्टी क्रिकेट सिरिज आफ्नो पक्षमा पारेको छ ।

बिहीबार राति ओभलमा सम्पन्न चौथो खेल ७ विकेटले जितेसँगै इंग्ल्यान्डले सिरिज २-० ले जितेको हो । यी दुई टोलीबीचको दुई खेल भने वर्षाका कारण हुन सकेन । दोस्रो खेल भने इंग्ल्यान्डले २३ रनले जितेको थियो ।

---

बिहीबार रातिको खेलमा भने १ सय ५८ रनको लक्ष्य इंग्ल्यान्डले १५ ओभर ३ बलमा ३ विकेट गुमाएर पूरा गर्‍यो ।

इंग्ल्यान्डको जितमा फिल साल्टले ४५ रन तथा कप्तान जोस बटलरले ३९ रन जोडे । पाकिस्तानका लागि हरिस राउफले ३ विकेट लिए ।

यसअघि टस हारेर पहिले ब्याटिङ गरेको पाकिस्तानले १९ ओभर ५ बलमा सबै विकेट गुमाएर १ सय ५७ रन बनायो ।

पाकिस्तानका लागि उस्मान खानले ३८ रन तथा कप्तान बाबर आजमले ३६ रन जोडे । इंग्ल्यान्डका लागि मार्क उड, आदिल रशिद र लियम लिभिङस्टोनले २-२ विकेट हात पारे ।