टी-२० विश्वकपमा सुपर आठका आज दुई खेल

काठमाडौँ- जारी टी-२० विश्वकप अन्तर्गत सुपर आठका आज दुई खेल हुँदै छन् । आज सुपर आठको समुह २ को वेस्ट इन्डिज र इङल्याण्डबीच खेल भइरहेको छ । सेन्ट लुसियास्थित डारेन सामी स्टेडियममा हुने यो खेल नेपाली समय अनुसार बिहान ६:१५ बजेदेखि भइरहेको छ ।

वेस्ट इन्डिजले समुह चरणका चारै खेल जितेर सुपर आठमा आएको हो भने इङ्‌ल्याण्डले भने ४ खेलमा दुई जित एक हार एक खेल वर्षाले रद्ध भएपछि अंक बाँडेर सुपर आठमा आएको हो । सेमिफाइनलमा पुग्न दुवै देशका लागि यो जित महत्वपूर्ण रहेको छ । सुपर आठको यस समुहमा अमेरिका र दक्षिण अफ्रिका रहेका छन् ।

---

वेस्ट इन्डिज र इङ्‌ल्याण्ड अहिलेसम्म टी-२० खेलमा २९ पटक आमने सामने भएका छन् । जसमा वेस्ट इन्डिजले १७ पटक जितेको छ भने इङ्‌ल्याण्डले १२ पटक जितेको छ । त्यस्तै घरेलु मैदान भएकाले वेस्ट इन्डिजले त्यसको फाइदा उठाउन सक्ने देखिन्छ ।

त्यस्तै आज दोस्रो खेल सुपर आठको समुह एक अन्तर्गत भारत र अफगानिस्तानबीच हुँदैछ । बारबाडोसस्थित केंसिंगटन ओभल मैदानमा हुने यो खेल नेपाली समय अनुसार राती ८:१५ बजेदेखि शुरु हुँदै छ ।

भारत समुह चरणमा ४ खेलमा ३ जित र एक खेल वर्षाले रद्ध भएपछि समुह ए मा शीर्ष स्थानमा रहँदै सुपर आठमा पुगेको हो । त्यस्तै अफगानिस्तानले समुह चरणमा ४ मध्ये ३ खेलमा जित एक खेलमा हार बेहोरेर समुह सी मा दोस्रो हुँदै सुपर आठमा पुगेको हो ।

अफगानिस्तानले अहिलेसम्म टी-२० अन्तर्राष्ट्रिय खेलमा भारतलाई हराउन सकेको छैन । अहिलेसम्म अफगानिस्तान र भारतबीच कुल ८ खेल भएका छन् । जसमा ७ खेल भारतले जितेको छ भने एक खेल रद्ध भएको थियो ।

दुवै देशका लागि सेमिफाइनलमा पुग्न यो खेल महत्वपूर्ण रहेको छ । यस समुहमा यी दुई देशका अलावा बंगलादेश र अस्ट्रेलिया रहेका छन् ।