एनपिएलका लागि विराटनगर किंग्सको तयारी पूरा

काठमाडौँ - मंसिर १५ देखि शुरु हुने नेपाल प्रिमियर लिग एनपिएल क्रिकेट प्रतियोगिताका लागि विराटनगर किंग्सले आफ्नो तयारी पूरा भएको जनाएको छ । विराटनगरमा पत्रकार सम्मेलन आयोजना गरी विराटनगर किंग्सका मालिक एवम् पूर्व क्रिकेट खेलाडी पारस लुनियाले आफूहरूले खेलाडी छनौट गरेको नभई कोचहरू र मार्की खेलाडी सन्दिप लामिछानेले खेलाडीहरू छानेको जानकारी दिए  । 

उनले आफूहरूले एनपिएलमा कोशी प्रदेशको नाम राख्ने गरी खेल खेल्ने र यस लिगले खेलाडी उत्पादनमा निकै सहयोग पुर्‍याउने बताए । उनले एनपिएल एक किसिमको व्यापार भएको र यसबाट मुलुक मात्र होइन क्रिकेट एसोसिएसन र क्रिकेट खेलाडीहरूलाई फाइदा पुग्ने जिकिर गरे ।

---

विराटनगर किंग्सका खेलाडीहरूले विराटनगर वडा नं. ६ स्थित मेरिलेबोन ज्वाला क्रिकेट मैदानमा प्रशिक्षण लिएका थिए । उनीहरू प्रतिस्पर्धाका लागि बुधवार राजधानी काठमाण्डौ जाँदैछन् । ५ जना विदेशी खेलाडी सहित ट्यालेण्ट हण्टबाट छानिएका ३ जना खेलाडीहरू समेत समावेश गरेर विराटनगर किंग्सको क्रिकेट टिम बनाइएको प्रशिक्षक दीपेन्द्र चौधरीले जानकारी दिए । एनपिएलको उद्घाटन खेलमा विराटनगर किंग्सले जनकपुर बोल्ड्ससंग प्रतिस्पर्धा गर्दैछ ।