भारत ३६४ रनमा अलआउट, इंग्ल्यान्डको खराब सुरुवात

काठमाडौँ - इंग्ल्यान्डविरुद्धको दोस्रो टेस्ट क्रिकेटमा भारत ३६४ रनमा अलआउट भएको छ । लर्ड्समा टस हारेर पहिले ब्याटिङ थालेको भारत दोस्रो दिनमा ३६४ रन बनाएर अलआउट भएको हो । उसका लागि ओपनर ब्याट्सम्यमान केएल राहुलले शतक बनाउँदा अर्का ओपनर रोहित शर्माले अर्धशतक बनाए ।

राहुलले १२९ रन बनाउँदा रोहितले ८३ रन बनाएका हुन् । इंग्ल्यान्डका जेम्स एन्डरसनले ५ विकेट लिए ।  यस्तै दोस्रो दिन नै आफ्नो पहिलो पाली थालेको घरेलु टोली इंग्ल्यान्डले खराब सुरुवात गरेको छ । उसले ओपनर डोम सिब्लेलाई ११ रनमा गुमाउँदा डेब्यु ब्याट्सम्यान हसिद हमिद डकआउट भए । दुवै विकेट भारतका मोहम्मद सिरजले लिएका हुन् । 

---

अर्का ओपनर रोरी बन्र्ससँग मिलेर कप्तान जोय रुटले इनिङ सम्हालेका छन् । यो समाचार तयार पार्दासम्म इंग्ल्यान्डले २ विकेट गुमाएर १०० रन बनाएको छ । यसअघि वर्षाले प्रभावित पहिलो टेस्ट बराबरीमा सकिएको थियो ।