टी–ट्‍वान्टी विश्वकपः अस्ट्रेलियाकाे सेमिफाइनल सपना जिवितै

काठमाडौँ- संयुक्त अरब इमिरेट्स (युएई)मा जारी ट्‍वान्टी विश्वकपमा बंगलादेशको यात्रा समाप्त भएको छ । बिहीबार अस्ट्रेलियासँग आठ विकेटले हारेपछि बंगलादेश समूह चरणबाटै घर फर्कने भएको हो । सुपर १२ को समूह १ मा बंगलादेश पुच्छारमा छ । बंगलादेशको खातामा पाँच खेलबाट शून्य अंक छ । 

दुबईमा भएको खेलमा बंगलादेश ७३ रनमा अलआउट भएको थियो । दुई दिनअघि दक्षिण अफ्रिकासँगको खेलमा पनि बंगलादेशी ब्याटिङ खराब लयमा थियो । दक्षिण अफ्रिकी टिमले बंगलादेशलाई ८४ रनमा सीमित गरिदिएको थियो । 

---

बिहीबारको खेलमा तीन बंगलादेशी ब्याट्सम्यानले मात्रै दोहोरो अंक छुए । उसका चार ब्याट्सम्यान त शून्यमै आउट भए । पराजित टिमका लागि शामिन हुसेनले सर्वाधिक १९ रन जोडे भने मोहम्मद नाइम र कप्तान मदमुदुल्लाहको नाममा क्रमशः १७ र १६ रन रह्यो । 

जवाफी ब्याटिङ गरेको अस्ट्रेलियाले ६.२ ओभरमा दुई विकेट गुमाएर ७८ रन बनायो । कप्तान आरोन फिन्चले अस्ट्रेलियाका लागि २० बलमा ४० रन जोडे । अर्का ओपनर डेभिड वारनरको नाममा १८ रन रह्यो भने अविजित मिचेल मार्सले १६ रनको योगदान गरे । 

खेलपछि मदमुदुल्लाहले यो विश्वकपमा बंगलादेशी टिमले आफ्नो स्तर अनुसारको प्रदर्शन गर्न नसकेको प्रतिक्रिया दिए । ‘हाम्रा लागि यो विश्वकप असाध्यै कठिन रह्यो । आफ्नो स्तर अनुसारको खेल्न सकेनौँ । हामीले आफूलाई प्रमाणित गर्न सकेनौँ ।,’ बंगलादेशका कप्तानको भनाइ थियो । 

बंगलादेशमाथिको जितसँगै अस्ट्रेलिया समूह १ को दोस्रो स्थानमा छ । शीर्षस्थानमो इंग्ल्यान्डभन्दा अस्ट्रेलिया दुई अंकले पछि छ । छ अंक नै बटुलेको दक्षिण अफ्रिका रनरेटका आधारमा तेस्रो स्थानमा छ । अस्ट्रेलियाले समूह चरणको अन्तिम खेलमा शनिबार वेस्ट इन्डिजको सामना गर्दैछ । सेमिफाइनल प्रवेशका लागि अस्ट्रेलियाले वेस्ट इन्डिजलाई हराउनै पर्नेछ ।