नेपालको जुनियर टिममा समेत प्रतिभावान् खेलाडी छन्ः पुबुदु

काठमाडौँ- नेपालको राष्ट्रिय क्रिकेट टिम (पुरुष)को मुख्य प्रशिक्षकमा नियुक्त भएका पुबदु दासनायकेले नेपाली क्रिकेटलाई थप उचाइमा पुर्‍याउन चाहेको प्रतिक्रिया दिएका छन् । शनिबार मात्रै मुख्य प्रशिक्षकमा नियुक्त भएका दासनायकेले नेपालको सिनियर टिममा मात्रै नभएर उमेर समूहका टिममा समेत प्रतिभावान् खेलाडी भएको प्रारम्भिक प्रतिक्रिया दिएका छन् । 

'यो जिम्मेवारी पाउँदा म अत्यन्तै हर्षित छु । यसका लागि क्यानलाई धन्यवाद दिन चाहन्छु । आशा छ म नेपाली क्रिकेटलाई थप उचाइमा पुर्‍याउन सक्नेछु । नेपालको सिनियर टिममा मात्रै होइन, उमेर समूहका टिममा समेत प्रीतभावान् खेलाडीहरू छन्,’ पुबुदुले भनेका छन् । 

---

दासनायके करिब ६ वर्षपछि पुरानै जिम्मेवारीमा फर्कन लागेका हुन् । यसअघि उनी अगस्ट, २०११ देखि नोभेम्बर, २०१५ सम्म नेपाली टिमको मुख्य प्रशिक्षकका रुपमा कार्यरत थिए । नेपाल क्रिकेट संघ (क्यान)ले शनिबार मात्रै उनलाई मुख्य प्रशिक्षकको पदमा नियुक्त गरेको हो । 

पुबदुले पहिलो कार्यकालमा नेपाली टिमलाई टी–ट्वान्टी विश्वकपसम्म पुर्‍याएका थिए । पहिलो पटक नेपालको प्रशिक्षक बन्दा उनले रोय डायसलाई प्रतिस्थापन गरेका थिए । संयोगवश यी दुवैले श्रीलंकन टिमका लागि खेलेका छन् ।