काठमाडौं । आईसीसी पुरुष टी–ट्वान्टी विश्वकप ग्लोबल छनोट खेलमा नेपालले विजयी सुरुआत गरेको छ। नेपालले आयोजक ओमानमाथि ३९ रनको जित हात पारेको हो ।

घरेलु टोली ओमानविरुद्ध टस हारेर पहिले ब्याटिङ गरेकोे नेपालले ८ विकेट गुमाउँदै ११७ रन बनायो । निर्धारित २० ओभर खेलेको नेपालले घरेलु टोलीलाई ११८ रनको लक्ष्य दिएको थियो ।
लक्ष्य पछ्याएको ओमान १७ ओभरमै अलआउट भयो । ओमानले ७८ रन मात्रै बनाउन सक्यो ।

---

जितका लागि नेपालले दिएको ११८ रनको लक्ष्य पछ्याएको ओमानका लागि नसिम खुसीले २४ रन बनाए । उनीबहेक अन्य ब्याटरले दोहोरो अंक बनाउन सकेनन् । आमिर कलिमले ९, जातिन्दर सिंहले ९, खबर अलीले ७, कलिमुल्लाहले ५, अयान खानले ३, जिसन मक्सुदले २ र सोएब खानले १ रन बनाए।  

नेपालको जितमा कमल सिंह ऐरीले सर्वाधिक तीन विकेट लिए । त्यस्तै  कप्तान सन्दीप लामिछाने र दिपेन्द्र सिंह ऐरीले समान दुई–दुई विकेट हात पारे । अविनाश बोहरा र जितेन्द्र मुखियाको नाममा एक–एक विकेट रह्यो । 

नेपालका लागि आरिफ शेखले सर्वाधिक ३८ रन जोडे । सन्दीप लामिछाने १६ रनमा अविजित रहे । लोकेश बमले १६, ज्ञानेन्द्र मल्लले १५ रनको योगदान दिए । त्यस्तै दिपेन्द्र सिंह ऐरीले ११, विवेक यादवले ७, कुशल भुर्तेलले ५, आशिफ शेखले ४ र कमल सिंह ऐरीले १ रन बनाए । 
ओमानका खवार अलीले सर्वाधिक ३ विकेट हात पारे । त्यस्तै विलाल खानले दुई–दुई विकेट लिए भने फयाज बट, जिसन मक्सुदको नाममा एक–एक विकेट रह्यो।