कोहलीलाई १०० औँ टेस्टमा ‘गार्ड अफ अनर’

काठमाडौँ : पूर्वकप्तान विराट कोहलीलाई भारतीय टेस्ट टिमका खेलाडीले ‘गार्ड अफ अनर’ सम्मान दिएका छन् । शनिबार श्रीलंकाविरुद्धको पहिलो टेस्ट क्रिकेटमा फिल्डिङ गर्ने क्रममा कोहलीलाई मैदान प्रवेश गर्नुअघि भारतीय खेलाडीले १०० औँ टेस्ट खेलिरहेका आफ्ना सफल र उत्कृष्ट टेस्ट टिमका पूर्वकप्तानलाई गार्ड अफ अनर सम्मान दिएका हुन् ।

१०० औँ टेस्ट क्रिकेटमा यस्तो सम्मान पाउने खेलाडी विरलै हुन्छन् । प्राय गार्ड अफ अनर सम्मान खेलाडीले सन्यास लिएपछि अन्तिम खेलमा दिने गरिन्छ । तर टेस्ट क्रिकेटमा भारतीय टिमले पाएको सफलता, लगातार पाँच वर्षसम्म नम्बर एक टिम बनाउँदै आइसीसीकै उत्कृष्ट खेलाडी र टेस्ट टिमको कप्तान बनेको सम्मानमा खेलाडीले कोहलीलाई गार्ड अफ अनर दिएका हुन् ।

शुक्रबार आफ्नो १०० औँ टेस्टमा कोहलीले ४५ रन बनाएका थिए । यससँगै उनी टेस्टमा आठ हजार रन बनाउने छैटौ भारतीय बनेका थिए । कोहलीले गएको महिना मात्रै टेस्ट टिमको कप्तानीबाट राजीनामा दिएका थिए ।

---