एकै बलमा २८६ रन !

काठमाडौँ - क्रिकेटमा एकै बलमा कति रन बन्न सक्छ ? सामान्य अवस्थामा ब्याट्सम्यानले छक्का प्रहार गरे त्यो नै एकै बलमा बन्ने धेरै रन बुझ्न सक्छौं । 

तर एकै बलमा २८६ रन बनेको थियो भन्दा पत्याउनु हुन्छ ? ब्रिटिस पल मल ग्याजेटको १५ जनवरी १९८४ मा छापिएको एक लेखमा यस बारे लेखिएको छ । अष्ट्रेलियाको बनबरीमा खेलिएको खेलमा भिक्टोरिया नामको टोलीले सो रन बनाएको थियो । खेलमा भिक्टोरियाको ब्याटिङका बेला हिर्काएको पहिलो बल नै रुखमा गएर अड्किएको थियो । 

---

फिल्डिङ टिमले त्यो बललाई हराएको मान्न र नयाँ बलले खेल सुचारु गर्न भनेपनि अम्पायरले बल देखिरहेको भन्दै बल झिक्न लगाएका थिए । त्यस रुखलाई काटेर बल झिक्दा सम्म क्रिजमा दाैडेर ब्याट्सम्यानले २८६ रन बनाएको लेखिएको छ । २२ यार्डको क्रिकेट पिचमा रन लिएर २८६ रन बनाउनु भनेको करिब ६ किलोमिटर दौडनु हो । 

यद्यपि यसलाई पत्याउन सकिने अरु आधार भने छैनन् । टेस्ट क्रिकेटमा एकै बलमा बनेको सबैभन्दा बढी रन भने ८ रन हो । टेस्ट क्रिकेटमा ४ पटकसम्म एकै बलमा ८ रन जोडिएको छ । यसको पछिल्लो उदाहरण भनेको अष्ट्रेलियाका एन्ड्रयु सिमोन्स र माइकल क्लार्कले जोडेको ८ रन हो । न्युजिल्यान्डका इयन ओ ब्रायनले गरेको बलमा सिमोन्स र क्लार्क ४ रन भागेको थिए भने ४ पटक सम्म ओभर थ्रो भएको थियो ।