शीर्ष स्थानको गुजरात पराजित

काठमाडौँ – इन्डियन प्रिमियर लिग (आइपीएल) अन्तर्गत शीर्ष स्थानको गुजरात टाइटन्सले दोस्रो पराजय भोगेको छ । मंगलबार राति भएको खेलमा पञ्जाव किंग्सले गुजरातलाई ८ विकेटले पराजित गर्‍यो ।

१० खेल खेलेको गुजरातले दोस्रो पराजय भोग्दा पञ्जावले भने १० खेलमा पाँचौं जित हात पारेको हो । शीर्ष स्थानको गुजरातको १६ अंक रहेको छ भने १० अंक सहित पञ्जाव ५ औं स्थानमा रहेको छ ।

---

पञ्जावले ५ औं जित हात पार्न १ सय ४४ रनको लक्ष्य १६ ओभरमा मात्र २ विकेट गुमाएर पुरा गर्यो । पञ्जावको जितमा शिखर धवनले अविजित ६० रन बनाउदा भानुका राजापाक्षाले ४० रनको योगदान गरे । गुजरातका लागि मोहमद सामी र लोकी फर्गुसनले समान १-१ विकेट लिए ।

यस अघि टस जितेर पहिले ब्याटिङ गरेको गुजरातले निर्धारित २० ओभरमा ८ विकेट गुमाएर १ सय ४३ रन जोड्यो । गुजरातका लागि साई सुदर्शनले अविजित रहदै सर्वाधिक ६५ रन जोडे । पञ्जावका लागि कगिसो रवाडाले सर्वाधिक ४ विकेट लिए ।