दाङमा इँटालाई सुन भन्दै बेच्न खोज्ने पाँच जना पक्राउ

काठमाडौँ– दाङको तुलसीपुरमा इँटालाई सुन भनेर बिक्री गर्न खोज्ने पाँच जना पक्राउ परेका छन् । पक्राउ पर्नेमा राजपुर गाउँपालिका– ६ खाँग्रा नाकाका राजकुमार बुढा (२६), प्रकाश खड्का (२४), दार्जुला व्यास–२ का सुरेन्द्रसिंह धामी (२३), सल्यान शारदा नगरपालिका–१ की सावित्रा बुढाथोकी (४९) र सोही जिल्लाको कुमाख गाउँपालिका–१ की गीता बुढा (३०) रहेका छन् । 

आइतबार राति ९ बजे तुलसीपुरको एकान्त होटलमा दुई वटा इँटालाई सुन भनेर बिक्री गर्न खोज्ने क्रममा उनीहरू पक्राउ परेका हुन् । उनीहरूको साथबाट दुई वटा इँटाको टुक्रा, हरियो रंगको जेब्रा झोला र सुनजस्तो देखिने पहेँलो धातुको टुक्रा बरामद गरिएको जिल्ला प्रहरी कार्यालय दाङका प्रहरी प्रवक्ता तथा डीएसपी मुकुन्दप्रसाद रिजालले बताएका छन् । उनीहरू​माथि अनुसन्धान भइरहेको प्रहरीले बताएको छ ।

---