कक्षा १२ को परीक्षा दिँदै गरेकी नक्कली परीक्षार्थी मनिषा पक्राउ

सङ्खुवासभा - खाँदबारी नगरपालिका–३ मानेभञ्ज्याङबाट नक्कली परीक्षार्थी पक्राउ परेका छन् । कक्षा १२ को परीक्षामा अर्कैको नाममा परीक्षा दिने एक नक्कली परीक्षार्थी पक्राउ परेको हुन् । 

पक्राउ पर्नेमा भोटखोला–४ की मनिशा गुरुङ रहेको जिल्ला प्रहरी कार्यालय सङ्खुवासभाका प्रहरी नायब उपरीक्षक लालध्वज सुवेदीले जानकारी दिए । 

---

खाँदबारी–३ को महेन्द्र माध्यमिक विद्यालय मानेभञ्ज्याङ परीक्षा केन्द्रमा बहिनीको नामबाट परीक्षा दिने दिदी पक्राउ परेकी हुन् । 

बाल विकास सिकाइ विषयको परीक्षामा नक्कली परीक्षार्थी बनेर परीक्षा दिँदै गर्दा प्रहरीले मनिषालाई पक्राउ गरेको प्रहरी उपरीक्षक सुवेदीले बताए । 

अरुणोदय माध्यमिक लिङ्गम कक्षा १२ का विधार्थी अनुषा गुरुङकोसट्टामा परीक्षा दिइरहेको अवस्थामा उनलाई प्रहरीले पक्राउ गरेको हो । नक्कली परीक्षार्थी मनिषालाई परिक्षा सञ्चालन भएको ४५ मिनेटपछि प्रहरीको जिम्मा लगाइएको महेन्द्र माध्यमिक विद्यालय मानेभञ्ज्याङका केन्द्राध्यक्ष मेदिनी घिमिरेले जानकारी दिए । 

पक्राउ परेकी मनिषालाई परीक्षा ऐनअनुसार कारबाही हुने जिल्ला शिक्षा समन्वय एकाइका प्रमुख केशव भट्टराईले बताए । नक्कली परीक्षार्थी पक्राउ परेको सङ्खुवासभाको पहिलो घटना हो । रासस