स्रोत नखुलेको ४३ लाखसहित कौशल पक्राउ

काठमाडौँ : गएराति चन्द्रागिरि नगरपालिका-२ नागढुङ्गाबाट  ४३ लाख नगदसहित एक व्यक्ति पक्राउ परेका छन् । दाङ तुलसीपुरबाट काठमाडौँ आउँदै गरेको प्रदेश नं ३–०१–००–६ ख ०९१२ नं को यात्रु बाहक बसलाई रोकी जाँच गर्ने क्रममा बसको यात्रु हिँड्ने प्यासेज (गल्ली) बाटोमा कार्टुनमा टेपले बाँधेको अवस्थामा ४३ लाख नगद र नौ थान छड्के तिलहरीसहितको पोते बरामद गरिएको छ । 

सोधपुछ गर्दा उक्त रकम तथा सामान तुलसीपुर उप-महानगरपालिका-५ का ३७ वर्षीय सन्दिप कौशलको रहेको भन्‍ने खुलेकाले उनलाई पनि पक्राउ गरिएको प्रहरीले जनाएको छ । उनले रकमको स्रोत खुलाउन नसकेकाले अनुसन्धानका लागि महानगरीय प्रहरी वृत्त थानकोटले थप अनुसन्धान गरिरहेको प्रहरी उपरीक्षक रमेशकुमार बस्‍नेतले जानकारी दिए । रासस

---