कर्तव्य ज्यानका फरार अभियुक्त १६ वर्षपछि पक्राउ

काठमाडौँ : महानगरीय अपराध अनुसन्धान महाशाखाले १८ वर्षीय किशोर जीवन लोहनीको हत्या गरी फरार अभियुक्तलाई पक्राउ गरेको छ । फरार अभियुक्त सनोज गिरी भनेर चिनिने रामकुमार गिरी (३३) लाई प्रहरीले सोमबार पक्राउ गरेको हो । उनलाई भक्तपुरको चाँगुनारायणबाट पक्राउ गरिएको हो । 

२०६१ साल माघ ११ गते काठमाडौँ सामाखुशीमा जीवन मृत फेला परेका थिए । यस घटनामा संलग्न गिरी १६ वर्षसम्म फरार थिए । फरार रहेका गिरी केही समय विदेशमा बसेको अनुसन्धानमा खुलेको छ । नेपाल आएर उनी सनोज गिरीको नामबाट लुकीछिपी बस्दै आएको प्रहरीले बताएको छ ।

---

काठमाडौँ जिल्ला अदालले २०६४ साल असोज ११ मा गिरीलाई दोषी ठहर गर्दै कैद सजाय सुनाएको थियो ।चितवनका जीवन लोहनी काठमाडौंको रानीबारीमा बस्थे । जीवनले प्रकाश लामाले कानमा लगाएको मुन्द्रा मागेका थिए । प्रकाशले मुन्द्रा नदिएपछि जीवनले प्रकाशलाई कुटपिट गरेका थिए । यहि निहुँमा जीवनको सामुहिक हत्या भएको थियो ।