बलात्कृत ८ वर्षीया बालिकाको उपचारमा आर्थिक अभाव, उल्टै पीडकबाट धम्की

बैतडी- १५ असारमा बैतडीको दशरथचन्द नगरपालिका– ८ की एक महिलालाई घरमा बोलाउन ८ वर्षीया छोरी खेतमा गइन् । खेतमा मकै गोडिरहेकी आमालाई बोलाउन गएकी बालिका नजिकै चिउरी खान पुगिन् ।

त्यसै बेला कतैबाट आएका उनको दाजु पर्ने एक किशोर आए अनि बोलाए । ती किशोरले उनलाई तानेर झाडीमा लगेर करणी गरे। 

---

उनले करणी गरेको एक बालकले देखेछन् । पाँच वर्षीय गाउँले बालकले छोरीलाई फलानोले पिटिरहेको भन्दै खबर गरेपछि २ घण्टापछि घटनास्थलमा पुगेकी आमाले छोरीलाई बेहोस अवस्थामा भेटिन् । हाडनाता करणी भएकी बालिकाकी आमाले प्रहरीमा खबर गरेका कारण पीडकको परिवारबाट बेला बेलामा धम्की आइरहेको पीडित बालिकाकी आमा बताउँछिन् । 

उनले भनिन्, ‘हामी गाउँ घरमै कुरा मिलाउथ्यौँ । किन प्रहरीमा रिपोर्ट गरेको भन्दै धम्की आउँछ । अब तिम्रो हाम्रो परिवारको रिसइबी सुरु भइसक्यो भन्छन् । म गरिब मान्छे के गरुँ ? । ’ पीडक किशोर अझै फेला नपरेकाले खोजीकार्य जारी रहेको जिल्ला प्रहरी कार्यालय बैतडीका प्रहरी निरीक्षक लोकराज जोशीले बताए । 

१५ वर्षका किशोरले ती बालिकालाई जंगलमा लगेर जबरजस्ती करणी गरेका हुन् । पीडक किशोर अझै फरार छन् । 

बेहोस अवस्थामा बालिकाकी आमाले फेला पारेकी उनलाई एक हप्ता जिल्ला अस्पतालमा राखियो । त्यसपछि २० दिन घरमै बसेकी उनको स्वास्थ्य अवस्था बिग्रदै गएपछि ११ साउनमा पुनः अस्पतालमा ल्याइयो । यसपटक भने उनलाई चार दिन अस्पताल भर्ना गरिए पनि उपचार हुन सकेको छैन । अहिले बालिका हिँड्न नसक्ने भएकाले बोकेर लग्नुपर्छ ।

पीडित बालिकाकी आमाले भनिन्, ‘छोरीको थप उपचारका लागि धनगढी लग्नुपर्ने हो । हामीसँग एक रुपैयाँ छैन । कतैबाट सहयोग हुन्छ की भन्दै नगरपालिकामा पनि गयौँ । केही सहयोग पाइएको छैन । सहयोग पाउने आश छ । प्रहरीमा उजुरी गरेका थियौँ । अहिलेसम्म पक्राउ गरिएको छैन् । झन पीडक व्यक्तिको परिवार र गाउँलेबाट उल्टै धम्की आइरहेको छ ।’

पीडित बालिकाका बुवा अपांग छन् । उनी जन्मजात आँखा देख्दैनन् । कसैलाई देखेमा ठम्याउन सके पनि आँखाको उपचार हुन सकेको छैन । तीन सन्तानकी आमा रहेकी पीडित बालिकाकी आमाले मजदुरी गर्दै हुर्काएकी छोरी नै बलात्कृत भएपछि अहिले उक्त परिवारमा ठूलो आर्थिक समस्या परेको छ ।