लागूऔषध ढुवानीको ट्रान्जिट बन्‍दै वीरगंन्‍ज

वीरगंज - लागूऔषधका कारोबारीहरू निषेधाज्ञाको समयमा पनि सक्रिय रहेको प्रहरीले जनाएको छ ।  लागूऔषध ढुवानी तथा तस्करीका लागि पर्सा र छेउछाउको ग्रामीण भेगका नाका प्रयोग गर्ने गरिएको प्रहरीको भनाइ छ । वीरगन्ज नाकाँट पनि अत्याधिक मात्रामा लागूऔषध ढुवानीको ट्रान्जिट बनेको प्रहरीको ठहर छ । लागूऔषधको कारोबार र दुव्यर्वसनमा खासगरी युवा उमेर समूहकै बढी पक्राउ पर्ने गरेको प्रहरीको भनाइ छ । 

वीरगंज कारागारका उपसचिव जेलर कृष्ण गैरेले कारागारमा हाल कूल कैदी बन्दीको आधा जति लागु औषधका मुद्दाका कैदी बन्दी रहेको जानकारी दिए । हालसम्म लागूऔषध बेचविखनमा मात्रै नभई लागूऔषधको दुर्व्यसनमा पनि अधिकांश युवाहरू नै संलग्न रहेको देखिएको पर्साका प्रहरी नायब उपरीक्षक ओम प्रकाश खनालले बताए । 

---

दैनिकजसो लागूऔषधको बेचविखनमा वा दुर्व्यसनीमा संलग्नहरू वीरगन्ज सीमा नाकाबाट पैदल रक्सौल पुगेर लागूऔषध सेवन गरेर वा लिएर आउने क्रममा नाकामै प्रक्राउ पर्न थालेको प्रहरीको भनाइ छ । प्रहरीले १ सय ९० वटा मुद्धामा २ सय ४८ जनालाई २०७५/७६ मा लागूऔषधकै मुद्दामा पक्राउ गरेको छ भने २०७६/७७ मा १११ वटा मुद्धा परेकोमा १ सय ७३, २०७७/७८ मा १ सय ३३ वटा मुद्दामा  १ सय ८१ र चालु आर्थिक वर्षमा १९ वटा मुद्धामा २८ जनालाई पक्राउ गरेको जनाएको छ । 

सुधार केन्द्रमा सबै जसो युवाहरू नै लागूऔषध दुर्व्यसनीमा फसेर आउने गरेको सानो पाईलाद्वारा संचालित सामुदायिक पुनर्स्थापना केन्द्रका कार्यक्रम संयोजक राजकुमार तामाङले  बताए । उनले हाल अधिकांश अभिभावकहरूको यो चिन्ताको विषय भएको बताए । युवाहरू लागूऔषधको कुलतमा लागेर छोड्नै नसक्ने अवस्थामा समेत पुगिसकेकोले प्राय ल्याइने गरिएकोले उनीहरूलाई उक्‍त कुलतबाट बाहिर ल्याउन सुधार केन्द्रमा हर सम्भव प्रयास गरिएको बताए । 

पर्सामा हाल लागु औषध उत्पदानमा प्रहरीले कडाइ गरेपनि मकवानपुरलगायतका जिल्लाबाट लागूऔषध विभिन्न नाका तथा जंगलको बाटो हुँदै वीरगंज सम्म ल्याउने र सीमा नाका पार गरेपछि महगोमा बेच्ने गरेको प्रहरीको भनाइ छ । त्यसैगरी कारोबारीहरूले भारतबाट यो नाका हुँदै भित्र्याउने लागूऔषध विभिन्न जिल्ला हुँदै काठमाडौंसम्म पुर्‍याउँछ गरिएको गरेको प्रहरीले जनाएको छ । निषेधाज्ञाको समयमा यस्ता वस्तुको माग झनै बढ्ने र महँगो मूल्यमा बिक्री गर्न पाइने भएकाले कारोबारी सक्रिय हुन सक्ने प्रहरीको भनाइ छ । 

सिमावर्ती भारत रक्सौलका स्थानीयवासी लव प्रसादका अनुसार दिनहु सयौ नेपाली युवाहरू सिमावर्ती बजार जाने गरेका छन्।  उनी भन्छन् , 'आजकल सिमावर्ती भारतीय रक्सौलको कतिपय क्षेत्रहरूमा नेपाली युवाहरू आउँने गरेको र दैनिक जसो र लागु पदार्थ सेवन गरेर र लिएर जाने गरेका छन् , यस्तोमा  भारत र नेपाल दुवै तर्फका युवाहरूको भविष्य बर्दाद भइरहेको त्यसैले दुवै तर्फका सरकारले यसमा तुरुन्तै ध्यान दिन जरुरी रहेको छ ।'

यसरी प्रदेश २ मा लागूऔषध सेवन गरेर आफ्नै साथीको हत्या , जबर्जस्ती करणी गरिएकालगायतका ८० प्रतिशत अपराधिक घटना लागूऔषधकै कारण भइरहेको प्रहरीको भनाइ छ। प्रदेशका युवाहरू लागूऔषधको कुलतमा फस्दै गएको तथ्यांक उच्च भए पनि प्रदेश सरकारले चालू आर्थिक वर्षको बजेटमा त लागूऔषध नियन्त्रणमा रकम विनियोजन भएको छैन । तर पोखरी सौन्दर्यकरणमा करोडौं बजेट छुट्टयाइएको छ ।