धनुषामा छोराले गरे बुवा र श्रीमतीको हत्या, खाल्डोमा भेटियो गाडिएको शव

जनकपुरधाम - प्रहरीले आफ्नै बुवा र श्रीमतीको हत्या आरोपमा एक जनालाई पक्राउ गरेको छ । धनुषाको मिथिला बिहारी नगरपालिका-५ ललिया निवासी ३० वर्षीय भागेश्वर मण्डललाई ५५ वर्षीय रामवृक्ष मण्डल र श्रीमती २१ वर्षीय अमृता मण्डलको हत्या गरेको आरोपमा पक्राउ गरिएको जिल्ला प्रहरी कार्यालय धनुषाले जनाएको छ।

ससुरा बुहारीबीच अनौतिक सम्बन्ध रहेको आशंकामा भागेश्वरले सोमबार राति आफ्नो बुवा र श्रीमतीलाई हत्यागरी घर नजिकको झाडीमा शव गाडेको फेला परेको प्रहरीले जनाएको छ । आज बिहान ससुरा बुहारी बेपत्‍ता भएपछि स्थानीयले खोज्दै जाँदा शव गाडिएको शंकास्पद भएपछि प्रहरीलाई खबर गरेको कुरा जिल्ला प्रहरी कार्यालय धनुषाका प्रहरी प्रवक्ता जितेन्द्र बस्नेतले बताए।

---

प्रवक्ता बस्नेतका अनुसार घटनाको प्रकृति हेर्दा भाटा लिएर टाउकोमा प्रहार गरी हत्या गरिएको देखिएको प्रहरीले जनाएको छ । दुवैको टाउकोमा गहिरो चोटका कारण मृत्यु भएको हो, तर शरीरका अन्य भागमा पनि चोटपटकको निशान देखिएको छ ।

घटनालगतै आरोपित भागेश्वर घरबटै पक्राउ गरी अनुसन्धान प्रक्रिया बढाइ सकिएको छ । आरोपिले भागेश्वर आफ्नो बुवा र श्रीमतीबीच अनौतिक सम्बन्ध रहेकोले हत्या गरेको स्वीकार गरेको प्रवक्ता बस्नेतले बताए ।

शव उत्खन्न गरी पोष्टमार्टमका लागि प्रादेशिक अस्पताल जनकपुरधाममा पठाइ सकिएको र आरोपितविरुद्ध कर्तव्य ज्यानको मुद्दा दायर थप अनुसन्धान प्रक्रिया अघि बढाइएको प्रहरीले जनाएको छ ।

स्थानीयको भनाइ उदृत गर्दै प्रवक्ता बस्नेतले भने भागेश्वर एक वर्षअघि वैदेशिक रोजगारीबाट घर फर्केका थिए । घर फर्केपछि उनले बुबा र श्रीमतीबीच अनैतिक यौन सम्बन्ध रहेको आशंका गर्दै आएका थिए । सो कारणले दिनहुँ बुवा र श्रीमतीसँग उनको झगडा हुँदै आएको थियो । सोही आशंकाको आधारमा उनले आफ्ना बुबा र श्रीमतीको हत्या गरेको हुन सक्ने स्थानीयको आशंका छ । भागेश्वर र अम्रिकादेवीका दुई छोरा र छोरी छन् ।