घरमै भरुवा बन्दुक बनाएर बेचबिखन गर्ने एक जना पक्राउ

विराटनगर - आफ्नै घरमा भरुवा बन्दुक बनाएर बेच्‍ने एक जनालाई प्रहरीले पक्राउ गरेको छ । भरुवा बन्दुक बेचबिखन गरेको भन्दै मोरङ प्रहरीले मोरङकै बेलबारी नगरपालिका-१ का ५२ वर्षीय आशबहादुर लिम्बुलाई पक्राउ गरेको हो ।

आइतबार बेलुका ६ बजे विशेष सूचनाको आधारमा ईलाका प्रहरी कार्यालय बेलबारीबाट खटिएको प्रहरी टोलीले लिम्बुलाई घरैबाट भरुवा बन्दुक निर्माणमा प्रयोग गरिने सामग्रीसहित नियन्त्रणमा लिएको मोरङ प्रहरी प्रवक्ता डिएसपी दिपक श्रेष्ठले बताए ।  

---

लिम्बुको घरबाट १ थान तयारी भरुवा बन्दुक, बन्दुक बनाउन प्रयोग गरिने नाल २ थान, काठको बट ४ थान, फलामको पड्किने पासो भएको बन्दुक १ थान, बारुद १ केजी, हरिणको सिङ ५ थान, बन्दुकको नाल सफा गर्ने रड १ थान, फलामको काँजो ३ थान बरामद गरिएको जनाइएको छ । पक्राउ परेका लिम्बुमाथि ईलाका प्रहरी कार्यालय बेलबारीले थप अनुसन्धान गरिरहेको छ ।