काठमाडौँ - चितवनको राप्तीमा एक पुरुषको हत्या भएको छ । जिल्ला प्रहरी कार्यालय चितवनका अनुसार राप्ती नगरपालिका-९ का ६० वर्षीय कान्छा लामाको गए राति हत्या भएको हो । कान्छाको हत्यामा संगल्न भएको आरोपमा ५० वर्षीय छिमेकी दशरथ ठकुरीलाई प्रहरीले पक्राउ गरेको प्रहरीले जनाएको छ ।

घटनास्थल पुगेको प्रहरीलाई स्‍थानीयले अवरोध गरेपछि केहीबेर तनाब उत्‍पन्‍न भएको थियो । घटनास्थलबाट हत्या आरोपीलाई नियन्त्रणमा लिने क्रममा प्रहरी र स्थानीय बीच झडपसमेत भएको थियो । स्थानीयले पक्राउ परेका व्यक्तिमाथि आक्रमण गर्न खोजेपछि प्रहरीसँग झडप भएको थियो ।

---

स्‍थानीयको ढुंगामुढा प्रहारबाट ३ जना प्रहरी र २ जना स्‍थानीय घाइते भएको प्रहरीले जनाएको छ । भिड उग्र बन्‍दै गएपछि प्रहरीले केही राउण्‍ड हवाइ फायरसमेत गर्नुपरेको जनाएको छ । प्रहरीकाअनुसार पेस्तोलबाट-१७ राउण्ड, अश्रुग्याँस-२७ सेल, एसएलआर-५ राउण्ड र ३०३ राईफलबाट १ राउण्ड हवाई फायर गरी स्थिति नियन्त्रणमा लिएको जनाएको छ । मृतकको शवलाई भरतपुर अस्पताल राखिएको छ ।