हत्या गरी सेफ्टी ट्यांङ्कीमा हालेको आरोपमा पाँच जना पक्राउ

झापा - गौरादह नगरपालिका-५  बस्ने ४६ वर्षीय मबेसिर हुसेन मियाँको धारिलो हतियार प्रहार गरी हत्या भएको घटनामा संलग्‍न रहेको आरोपमा पाँच जनालाई प्रहरीले पक्राउ गरेको छ । 

पक्राउ पर्नेहरूमा गौरादह नगरपालिका-५ बस्‍ने ३१ वर्षीय महम्मद सद्दाम, उनकी श्रीमती २८ वर्षीया सुमेरन खातुन, सोही ठाउँ बस्ने २६ वर्षीय महम्मद सुलेमान, उनकी श्रीमती २२ वर्षीया रुक्सार खातुन र सोही ठाउँ बस्‍ने ३८ वर्षीया कुर्समान खातुन रहेका छन् । 

---

मबेसिर हुसेन कात्तिक ११ गते बिहानदेखि हराएको भन्ने सूचनाका आधारमा ईलाका प्रहरी कार्यालय दमकबाट खटिएको प्रहरीले कात्तिक २६ गते महम्मद सद्दामको घर तलासी लिनेक्रममा उनको घर बाहिर रहेको सेफ्टी ट्यांङ्की भित्र हत्या गरी कम्बलमा पोको पारेर फालिएको अवस्थामा उनको शव फेला परेको थियो । 

थप अनुसन्धानको क्रममा व्यक्तिगत रिसइबीको कारण मबेसिर हुसेनको हत्या गरेको खुल्न आएपछि उनीहरूलाई प्रहरीले पक्राउ गरेको हो । घटनामा प्रयोग भएको धारिलो हतियार दाउ, छुरी र घन (मार्तोल)लगायत प्रहरीले बरामद गरेको छ । 

उनीहरूबारे थप अनुसन्धान भईरहेको जिल्ला प्रहरी कार्यालय झापाले जनाएको छ ।