४४ लिटर रक्तचन्दनको तेलसहित दुई जना पक्राउ

काठमाडौँ - रक्तचन्दनको तेलको अवैध कारोबार गरेको आरोपमा दुई जना पक्राउ परेका छन् । 

बुढानिलकण्ठ नगरपालिका-५ पञ्चकुमारी मन्दिर नजिकबाट ४४ लिटर रक्तचन्दनको तेल सहित दुई जनालाई बुधबार प्रहरीले पक्राउ गरेको हो । 

---

पक्राउ पर्नेहरुमा काठमाडौं बालाजु बस्ने रामेछाप उमाकुण्ड गाउँपालिका-४ घर भएका २७ वर्षीय रामबहादुर खत्री र काठमाडौं बुढानिलकण्ठ नगरपालिका-५ बस्ने कास्की लेखनाथ घर भएका ४० वर्षीय गंगाबहादुर पुन रहेका छन् । 

रक्तचन्दनको तेल प्रतिलिटर नगद ५ लाख रुपैयाँको दरले अवैध कारोबार भइरहेको भन्ने सूचनाको आधारमा महानगरीय अपराध महाशाखा मिनभवनबाट खटिएको प्रहरीले उनीहरुलाई पक्राउ गरेको हो । 

उनीहरुलाई आवश्यक कारवाहीको लागि वन डिभिजन कार्यालय हात्तीसार पठाइएको महाशाखाले जनाएको छ ।